有日打開雪櫃睇下有咩食材要清，
湊湊埋埋原來可以來個西班牙海鮮飯，
但其實反而叫海鮮什錦燴飯會貼切啲，
因為始終都想迎合返Bella口味，
無落酒，亦無出去搵番紅花、Paella米，
所以算是個親子共食變奏版，
不過咁樣煮味道真的非常不錯，
做完個賣相都幾治癒，
最重要係啲飯軟淋淋好入味，
Bella難得好快好快食哂成碗飯。
材料方面都幾多，
不過都容易準備的，
我今次用上意大利米來燴飯底，
所以燴飯嘅時間會有點長，
另外就是準備一個大平底鍋，
而且最好有蓋子的。
「親子共食變奏版~西班牙海鮮飯」
材料（3人份）：
大蝦4隻（剪開背殼挑走蝦腸）
青口10隻
八爪魚粒及帶子肉（可按喜好份量準備, 也可用魷魚圈）
#以上急凍海鮮可先用酒醃2小時去雪味,然後沖沖水
洋蔥1/3個切粒
紅椒半個切粒
蕃茄2個去皮去頂搗成蓉
青瓜半條切粒
蒜頭兩瓣切碎
檸檬半個切瓣
上湯500ml
米125克
紅椒粉/鹽
橄欖數粒切片（optional)
香芹粒（optional)
做法：
平底鍋下油，爆香蒜蓉及洋蔥，
待其揮發香味出來後，再加入紅椒粒炒。
然後再加入意大利米與材料拌勻炒一會，
再加入蕃茄蓉再炒，蕃茄蓉會出水，
待其收乾7成水份後，慢火燴煮，
每次加入上湯後讓米吸收一會水份，
到差不多收水時拌勻一下再次加入湯，
大約分4次加湯，期間可以加蓋子加快燴透速度，
直至見米粒有8成軟透時，
可加入半茶匙紅椒粉及鹽拌勻，試味。
然後加入橄欖片、青瓜粒及香芹碎，
與飯拌勻後再燴至9成乾水。
此時，在飯上舖上所有海鮮及檸檬，
蓋上蓋子燴至海鮮熟了即成；
如果無蓋子又或想加快海鮮熟成，
可與飯一齊炒勻就會較快熟。
上湯可買現成魚湯或菜湯，
也可自製更健康，例如滾蕃茄、
紅蘿蔔、紅菜頭高湯都可以。
吃時可唧小小檸檬汁會更開胃~
FB專頁: www.facebook.com/huihuiplayground
聯絡我們: jassmine_tea@yahoo.com.hk
