偶然醒起好耐無整豆腐比Bella食，
都係因為街市豆腐檔地濕路窄，
次次推住車仔都吾方便推入去，
自己又吾甘心買超市一盒盒嘅豆腐，
因為喺豆腐檔鮮製嘅豆腐先有營養，
所以前幾日專登孭住Bella去買，
今次想用豆腐，昆布同肉碎，
去整一客軟綿綿嘅迷你漢堡扒，
因為有D BB 吾鍾意食肉，
嫌肉質“鞋口”，
但加入豆腐後口感就會似蛋餅。
昆布即係海帶/海藻，
同豆腐一樣都有豐富營養，
而且因為加左豆腐所以肉餅咬下去軟綿綿，
加左昆布嘅漢堡扒，
適合一歲以上踏入咀嚼期嘅BB，
九至十一個月BB，可以吾加昆布，改為菜蓉，
吾想煎，可以改為蒸，同樣健康美味。
《軟綿綿迷你昆布豆腐漢堡扒》
材料：
1. 布包豆腐1/4磚
2. 肉蓉，份量與1/4豆腐大小相約，我用水展肉，不會太肥，肉質不會太“鞋”。
3. 昆布乾一小條
4. 粟粉或麵粉2茶匙
做法：
豆腐可事前瀝乾水放碗中，
上面可舖一層保鮮紙，
再放有少少重量的物件如水杯壓住，
這樣會更快令豆腐排出多餘水份。
昆布洗淨浸水發開，
通常浸2～3個鐘，直到肯定質感變軟，
否則BB咬到太硬會吐出來。
浸發後，把昆布剪碎。
豆腐放大碗中壓爛成蓉。
加入肉蓉拌勻。
再加入粟粉拌勻。
最後加入昆布碎拌勻，
把肉分成四份方便造型。
手掌可先沾小小水免太黏，
取一份放掌中，酌量按成圓形，
然後左右手互抛於掌心撻肉餅，
此舉可把肉餅入面空氣迫出來，
幫助煎的時間肉餅不會散開。
一份1/4肉撻完可再分成4份迷你小肉餅，
厚度做約0.5cm便可，太厚會較難熟。
放平底鑊中加點油中慢先煎一面。
**如果不想煎的就直接把小肉餅改為蒸，
中大火12分鐘左右
再慢火煎另一面，切忌大火，
才會做到金黃色而不是燶黑。
迷你一口漢堡扒，很可愛！
入面軟淋淋的，如果想再軟就可加豆腐減肉。
是日Bella嘅晚餐，一口漢堡扒配蜆殼粉。
希望大家BB喜歡，
《軟綿綿迷你昆布豆腐漢堡》～
下次再分享更多BB特色食譜，
記得留意我地facebook上載😊
