FACEBOOK專頁

2020/02/28

3歲分床記~ 足不出戶美國網購兒童床分享~

一家三口終於有覺好訓~


自從拆走左Bella張BB床後,
差不多呢一年時間,
佢大致上都係同我哋一齊訓大人床,
之前屋企有張摺床,
間中爸爸都會訓下,
但長久唔係辦法,
雖然大床都有5尺半闊,
但Bella嘅睡姿會成晚似個時鐘咁360度轉,
搞到一家三口每晚訓覺都打杖咁,
所以我一直都搵緊張安全唔會跌落地嘅兒童床~

近半年一直都有周圍睇,
首要考慮嘅一定係尺寸,
鑑於暫時我未放心同佢分房訓,
所以張兒童床只可以放喺大人床邊,
Ikea嗰啲平靚正,但可惜唔係太闊就太長;
要不見過出面有得伸縮質量好好嘅又要六七千蚊太貴;
塑膠款又感覺有點兒嬉;
曾經喺淘寶睇啱張木床,尺寸同價錢都ok嘅,
但當時考慮到上樓運費仲貴過張床兩倍,
又有點擔心質量,所以一直猶豫不決,
到而家呢個疫勢就更加唔洗買,
就算我唔驚,店家發貨都要一波三折喇。

到上星期終於比我搵到呢張非常合心意嘅床,
喺美國網購後DHL直郵到我屋企,
張床連運費加埋先千一蚊港紙,美國牌子,
尺寸fit哂我需要,木製,最緊要材料合乎安全標準,
所以打開都唔覺有啲咩味,
而且仲有防跌欄,長度應該可以訓到6歲,
而且我揀呢張嘅原因係之後唔訓更可以一分二做兩張梳化✌。爸爸用左半個鐘安裝,安裝都好易。
 
 
 

 而兒童床褥我一樣喺美國網購,
兒童床褥起碼揀張5寸厚先有承托力,
香港市面上選擇真係好少好少而且貴,
我呢張有6寸厚,同張床match到size,
見佢做特價連UPS直郵我家只係一千蚊鬆啲,
真空卷裝入箱包裝,打開後放一日等佢漲回原型。
 
 
 
 
仲有買左啲防水床褥保護墊,床單枕頭等,
真係好鬼平又免運費,
全部野由落單到送到我屋企只係6日,好快😉
 
 
 


本來我哋都怕買左床後Bella唔肯訓,
好彩佢見到有自己嘅床好興奮,
第一晚已經帶走左佢嘅左右護法(兩隻熊貓🐼🐼),
唔要阿媽喇😢,雖然一家三口終於有優質睡眠,
但我忽然有種強烈感覺,之後會係我好掛住佢,
好想再擁住佢入睡呢😭
 

 
**************************
~ 許許與小BELLA ~
隨性的玩樂型媽媽~ 喜歡做BB特色料理~ 愛分享BB好物情報~
記得留意我地FACEBOOK瀏覽更多玩樂情報及BB食譜啦~
FB專頁: www.facebook.com/huihuiplayground
聯絡我們: jassmine_tea@yahoo.com.hk


*

Related Posts Plugin for WordPress, Blogger...