拜疫情所賜，超市咩粉都無喇，只有千層麵，人生第一次整，原來唔難喎，份量亦都唔會太死板，好按個人喜好的！
今次個千層麵有4款料去撘層，有蕃茄肉醬、芝士白汁、麵皮同芝士碎。好彩一直都有呢啲配料喺屋企，唔洗又再周圍撲！
不過就要有個焗爐（或氣炸鍋），同埋放得入爐嘅長方/或方型器皿！
肉醬千層麵（2-3人份）
麵皮：3塊（一盒入面都有10多塊）
芝士碎：一飯碗（或按個人喜好）
白汁層：
-牛奶400克
-低筋麵粉60克
-牛油60克
-水200克
-芝士碎（我用pizza混合芝士）3勺中式湯匙
蕃茄肉醬：
-免治肉300克（我用豬肉，先用少少鹽、胡椒粉，加2茶匙水醃30分鐘）
-去皮蕃茄及茄膏（可用罐頭），因為我買唔到所以直接用意粉醬也非常方便，還有幾夥橄欖片，份量用160-200ml左右，視乎想要醬汁是否濃厚
-蒜3瓣切碎，洋蔥半個切碎
-黑椒碎（調味）
做法：
鍋中加入牛油，中大火使其溶化，然後加修麵粉，不斷混合攪勻。
再分3次加入牛奶，期間不斷用鑊鏟平底壓開黏住的麵糊，使其平滑，最後再逐些加入水，調至個人喜歡的濃稠度。
最後加入芝士碎攪拌溶化即成，盛起備用。因為芝士有咸味，所以無需加鹽。
麵皮處理：
我購這款麵皮可以直接使用，不用預先煮淋，但因為我想縮短烤焗時間，以及口感軟些，所以放入滾水中「卓」一下陣，麵皮會好快變軟，就可即時夾起，無需卓太耐，如果幾塊一起煮就記得水中加些油，以免黏在一起撕爛。
煮軟後把麵皮放分開放在碟中，此時可量度器皿大小，看是否要剪成相應尺吋。
蕃茄肉醬做法：
鍋中加些油，爆香蒜蓉及洋蔥碎。
再加入肉碎炒勻，變色後加入醬料炒勻，可加些黑椒碎，即成。盛起備用。
疊層做法：
我這長方器皿剛可fit到麵皮長度，闊度就用了1.5張麵皮，掃些油後，把麵皮舖底，在上面塗勻白汁。
再塗肉醬，然後灑上芝士碎，這樣為之一層。
分別重複做3次（3層），送入焗爐200度12-15分鐘（因為所有材料都熟的，基本上焗濕麵皮，溶化芝士便可）
最後2分鐘可在面上加些芝士碎做些視覺效果。即成。
