明明自己啲啲酒都飲唔到，但每次整醉嘢都好似繞樑三日咁😄，為咗唔好浪費個汁，一整就一大兜，放入雪櫃雪凍，嗰兩三日每日都拎啲啲出黎食，每次食又停唔到口，但又會驚食醉自己.....😆
本來猶豫到底要不要做醉雞或者醉雞卷，但因為醉雞我慣咗要做冰火三重嘅步驟先至夠滑，而屋企個冰格最近清極都清唔到，無位製唔冰，所以今次先向簡單嘢埋手！
我發現醉呢幾味餸，真係方便過整醉雞好多🥳，唔洗搞太多步驟。不過最靈魂一定係個醉汁，調啱比例就無敵💪🏻，掉咩落去出到黎都會好好食🤤
醉•三小碟
因煮的過程沒有留下太多圖片，事後因網友查詢食譜，所以今次食譜只有文字沒有太多圖喔！
材料：
豬腳兩磅、雞翼尖一磅、
擦乾淨的鮮鮑魚份量隨意
淆餸料：
蔥兩棵
兩茶匙五香粉
一粒冰糖（1/3隻雞蛋大）
一粒八角
兩片香葉
三湯匙花雕酒
冰水
醉汁：
500ml雞湯/上湯
500ml糟鹵
4-5粒紅棗
幾片當歸
2湯匙杞子
400ml花雕酒
做法：
(A)煮餸料
預備一鍋水，水份量要蓋過餸料，加入數片薑把它們先出水（鮑魚除外），然後取出沖乾淨，再燒一鍋水，水份量要夠蓋過餸料，放入2棵蔥段、數片薑、煮滾後先加入鮮鮑焯熟，然後瀝乾水盛出放涼，之後放入豬腳及翼尖，再下兩茶匙五香粉、一粒冰糖、一粒八角、兩片香葉及三湯匙黃酒繼續煮。另預備熟冰凍水。翼尖煮約15分鐘至熟透，便可即時盛起瀝水放入冰水中冷卻（可換一次冰水皮會更爽滑），豬腳則需再中慢火燘淋，約1.5小時，直至煮到滿意的軟淋度後，便可即時盛起瀝水放入冰水中冷卻，步驟同翼尖做法。
(B)煮醉汁
鍋中放入雞湯/上湯，再加入糟鹵，紅棗及當歸一同煮，滾後轉中慢火煮15分鐘，關火，即時放入杞子，加蓋焗5分鐘。把醉汁倒入大器皿內，徹底放涼後，加入花雕酒，及所有餸料拌勻。封好放雪櫃浸一晚，第二日即可取出食用。*餸料會越浸越入味，但最好4天內食完。
