夏日炎炎想解渴但唔想掂汽水珍奶？
呢杯自製「蜂蜜話梅鹹青檸梳打」幫到你！
Refreshing~~
前幾年好鍾意去吉隆坡旅行，每餐都會叫杯冰凍鹹青檸話梅梳打，或青檸話梅茶，非常好飲，尤其是去親嗰到都食好多辣同煎炸食物，天氣又熱，飲返杯真係勁消暑下火！
不嗆喉的自醃話梅青檸~~
最近喺街市見到有小青檸賣，令我記返起呢杯特飲，竟毫不考慮就買咗兩磅回來，自己跟住試下醃鹹青檸！
夏日消暑特飲 ~~
除咗鹹青檸同話梅，仲有鮮薄荷葉同蜂蜜，加埋梳打水做底，其實也可以加紅茶底，又是另一番風味，酸酸咸咸甜甜，超解渴解膩，成本又低！
自製夏日消暑特飲：蜂蜜話梅咸青檸梳打
材料（份量隨意）：
小青檸
話梅或話梅肉
泰國青檸
薄荷葉
蜂蜜
梳打水
市面上多數是泰國青檸，這種小青檸多數偶爾在街市生果檔或菜檔才可見到，如果沒找到也可用泰國青檸代替。
話梅我就買了這種無核的甜話梅肉。
做法：
先把青檸洗淨。洗淨後要徹底抺乾身，不要有水份。於中間切開，但不要切斷，然後放入一夥話梅肉。
另備一個玻璃樽或食物盒。先前條件是用滾水淥遍內部去菌，再徹底放乾身。
然後把青檸話梅放入，封好蓋子，放入雪櫃待7-10天。期間不要打開蓋子。
醃好的青檸話梅會變色變軟。不用額外加鹽及水，純粹以話梅去醃，已做到「鹹甜酸」，鹹味同時也不會太heavy嗆喉!
準備好各樣材料於杯內，包括醃好的鹹青檸話梅，鮮薄荷葉，泰國鮮青檸，倒入凍梳打水或紅茶，也可加冰。最後加入蜜糖搞拌即成。
「非•常•透•心•涼」
同場加映 #雙檸話梅氣炸雞翼
鹹青檸話梅同雞、魚，味道好夾；今次試用佢加少少味醂來醃雞中翼，再氣炸，非常入味，食嘅時候再唧啲青檸汁，真係唔錯！
