白汁菠菜三文魚酥皮月餅
屋企個月餅模其實買咗兩三年，每年都諗住自己整月餅，但每年未整前四方八面都會送來好多盒，處理都頭痛，自製月餅都係得個諗字！
今年無意中喺fb見到最近好hit，話日賣9000個嘅「威靈頓牛柳、酥皮菠菜三文魚月餅」，即刻疊埋心水開工自己試、個月餅模終於可以見光！
呢個月餅我整咗三次先成功，用咗三種唔同嘅皮做，今次呢隻酥餅皮係最滿意，牛油香口感酥、同白汁菠菜三文魚好鬼夾，唯美中不足要挑剔就係嫌「中秋」兩字唔夠凸出！
當一餐西餐食㗎喇！傳統月餅一年食一次都驚漏，我呢款每次月圓之夜都可以整，哈哈XD！
餅皮材料：8個迷你份量
低筋粉150克
蛋液1隻
無鹽牛油70克
餡料：
無骨三文魚柳1件
菠菜苗約20棵
牛奶50ml+1茶匙生粉拌勻
做法：
先將三文魚柳去皮，印乾、再約切1x1吋大小的尺寸，用鹽、香草醃半小時！
菠菜洗淨去根。水滾後放入煮剛軟身便可盛起，瀝乾所有多餘水份，並剪碎菠菜。
鑊中加入（一半）拌勻的牛奶及生粉，放入菠菜碎，慢火煮滾，期間把菜及汁拌勻，如不夠汁就再加牛奶生粉水，建議分幾次加入，再加少少鹽，直至水份剛剛吸收就夠，不要太水汪汪。然後盛起備用，不要盛出太多水份。
做餅皮：
牛油及2/3隻蛋液拌勻，分兩次篩入麵粉，拌勻成粉糰。
用手搓勻餅皮，分出45克一粒（用於迷你月餅模具），然後放入雪櫃雪15分鐘。
取出放兩層保鮮紙中間，用棍碌成圓餅皮，再放入雪櫃雪15分鐘。
取出，於餅皮中放上一粒三文魚，再覆蓋上菠菜，然後借保鮮紙及手指包裹著餡料及收口。
於月餅模上掃麵粉防黏，多餘的粉要敲出。收口位那一面用來壓字，放入月餅模。
用陰力壓緊月餅，推出月餅時最好直接推在焗盤的牛油紙上，以防再移動！
預熱焗爐，用230度先焗5分鐘定型。
另一邊餘下的1/3蛋液，加半茶匙老抽攪勻，
當定型後，取出月餅，用老抽蛋液整個掃色（坑紋不要掃），然後回焗爐180度/10分鐘取出即成！
